ඩයලොග් ආසිආටා හෝමාගම මූලික රෝහලේ ඇඳන් 10 කින් සමන්විත දැඩි සත්කාර සංකීර්ණයේ වැඩ කටයුතු සඳහා මුලපුරයි

ශ්රී ලංකාවේ ප්රමුඛතම සන්නිවේදන සම්පාදකයා වන ඩයලොග් ආසිආටා පීඑල්සී සමාගම, හෝමාගම මූලික රෝහලේ පූර්ණ ක්රියාකාරී දැඩි සත්කාර ඒකකයක් ස්ථාපිත කර, ඊට අවශ්ය සියලු උපකරණ සපයමින්, එය පුළුල් කිරීම සඳහා කඩිනමින් අවශ්ය කටයුතු අරඹා තිබේ.සෞඛ්ය හා දේශීය වෛද්‍ය සේවා අමාත්යාංශය විසින් තෝරාගත් රෝහල් සඳහා කඩිනමින් අවශ්ය දැඩි සත්කාර ඒකක සංවර්ධනය සඳහා රු. ලක්ෂ 2000ක් ලබාදීමට එකඟවීමේ වැඩපිළිවෙලෙහි දෙවනි අදියර යටතේ, ඩයලොග් සමාගමේ පූර්ණ මූල්ය දායකත්වයෙන් මෙය සිදුකරනු ලබයි.

දැනට ඉදිකිරීම් ආරම්භ කර ඇති දැඩි සත්කාර ඒකකය ස්ථාපිත කිරීම මගින් ඇඳන් 10 කින් හා නවීන උපකරණවලින් යුත් පූර්ණ ක්රියාකාරී දැඩි සත්කාර සංකීර්ණයක් හෝමාගම මූලික රෝහලට හිමිවන අතර, අසාධ්ය තත්වයේ පසුවන රෝගීන්ට ප්රතිකාර කිරීම සඳහා රෝහල සතු හැකියාව උසස් තලයකට ගෙන එනු ලබයි. කොවිඩ්- 19 රෝගීන්ට ප්රතිකාර කරන ප්රධානතම රෝහල් 18 න් එකක් වන හෝමාගම මූලික රෝහල වර්තමානයේ ඇඳන් 400 කින් සමන්විතව වාර්ෂිකව රෝගීන් 400,000 කට ප්රතිකාර කරයි. ඩයලොග් ආසිආටා විසින් රෝහලේ දැඩි සත්කාර පහසුකම් ප්රතිෂ්ඨාපනයට සහායවීම හරහා බරපතල තත්ත්වයෙන් රෝහලට ඇතුළත් කරන රෝගීන්ගේ දිවි ගලවාගැනීමේ අවස්ථා දීර්ඝකාලීනව ඉහළ නැංවීමටත්, එවැනි රෝගීන්ට ප්රතිකාර කරන වෛද්ය කාර්යමණ්ඩල සාමාජිකයන්ගේ පීඩනය අවම කිරීමටත්, දැඩි සත්කාර ඒකකවල වෛද්යවරුන්ගේ පුහුණුවට සුවිශේෂී වටිනාකමක් එක් කරමින් දිස්ත්රික්කයේ සෞඛ්ය පද්ධතිය වැඩි දියුණු කිරීමටත් මහෝපකාරී වේ. මීට පෙර ඩයලොග් ආසිආටා සමාගමේ පූර්ණ මුල්ය දායකත්වයෙන් මීගමුව දිස්ත්රික් මහා රෝහලට පූර්ණ ක්රියාකාරී දැඩි සත්කාර වාට්ටු සංකීර්ණයක් තිළිණ කරන ලදී.

මේ සම්බන්ධයෙන් අදහස් දැක්වූ හෝමාගම මූලික රෝහලේ වෛද්ය අධිකාරි, වෛද්ය ජනිත හෙට්ටිආරච්චි “ඇඳන් 2 කින් සමන්විත දැඩි සත්කාර ඒකකයකින් සහ රෝගීන්ගේ දැඩි තදබදයක් පවතින වාතාවරණයක් හමුවේ කොවිඩ් - 19 රෝගීන්ට ප්රතිකාර කරන වෛද්ය මධ්යස්ථානයක් බවට පරිවර්තනයවීමේදී හෝමාගම මූලික රෝහල මුහුණදුන් ප්රධානතම ගැටලුව වූයේ පූර්ණ ක්රියාකාරී දැඩි සත්කාර ඒකකයක් නොමැතිවීමයි. මේ වෙනුවෙන් ඩයලොග් සමාගමෙන් හිමිවූ සහාය අප සිහිපත් කරන්නේ ඉමහත් ගෞරවයෙන්. පූර්ණ ක්රියාකාරී දැඩි සත්කාර ඒකකයක් ස්ථාපිත කිරීම මගින් කොවිඩ් - 19 රෝගීන්ට ප්රතිකාර කිරීමට පමණක් සීමා නොවී, වැඩි රෝගීන් සහ සැත්කම් සංඛ්යාවක් සඳහා පහසුකම් සලසමින් දැඩි සත්කාර සඳහා විශේෂ අවධානයක් ලබාදීමට අපට හැකිවෙනවා.”

ඩයලොග් ආසිආටා පීඑල්සී හි සමූහ ප්රධාන විධායක සුපුන් වීරසිංහ මෙසේ පැවසීය, “මීගමුව දිස්ත්රික් මහා රෝහලට පූර්ණ ක්රියාකාරී දැඩි සත්කාර ඒකකයක් තිළිණ කිරීමෙන් පසුව, හෝමාගම මූලික රෝහලේ පූර්ණ ක්රියාකාරී දැඩි සත්කාර ඒකකයක් ස්ථාපිත කිරීමේ කටයුතු අප ආරම්භ කළා. ඊට අවශ්ය සියලු උපකරණ සපයමින්, එය පුළුල් කිරීම සඳහා කඩිනමින් අවශ්ය කටයුතු ආරම්භ කිරීමට අපි මේ වනවිටත් පියවර ගෙන තිබෙනවා. සෞඛ්‍ය අමාත්‍යාංශය සමඟ මූලිකත්වය ගෙන හෝමාගම මූලික රෝහල වෙනුවෙන් මෙවැනි සත්කාරයක් ඉටුකිරීමට ලැබීම අප ලද භාග්‍යයක් සේ සලකනවා. මෙම දැඩි සත්කාර සංකීර්ණයේ කටයුතු හැකි ඉක්මණින් අවසන් කිරීම අපේ බලාපොරොත්තුව වන අතර, මෙරට සෞඛ්‍ය ක්ෂේත්‍රයේ අභිවෘද්ධිය වෙනුවෙන් දායකවීමට අප ලද මහඟු අවස්ථාව පිළිබඳව අතිශයින් සතුටු වෙනවා.”