මෙරට පෞද්ගලික අංශයේ සමාගම් සහ ආයතන කිහිපයක් එක්ව ක්‍රියාවට නංවන ‘මනුදම් මෙහෙවර’ සහන සැපයීමේ වැඩසටහන සමඟ London Stock Exchange සමූහය අත්වැල් බැඳගනීයි

ඡායාරූපයේ වමේ සිට දකුණට:Capital Markets LSEG Technology හි සේවා කළමනාකාර සහ ව්‍යාපාර විශ්ලේෂක හිරාන් ජයරත්න, සර්වෝදය ශ්‍රමදාන ව්‍යාපාරයේ සභාපති වෛද්‍ය වින්‍යා ආරියරත්න, ඩයලොග් ආසිආටා පීඑල්සී හි සමූහ ප්‍රධාන මූල්‍ය නිලධාරී හොං සු වොං, LSEG Sri Lanka හි මානව සම්පත් ප්‍රධානී පුලස්තිකා වීරසිංහ, LSEG Sri Lanka හි ආයතනික සමාජ වගකීම් හා තිරසර අංශයේ සහකාර කළමනාකාරිණී සාරා සඩූන්.

Dialog Axiata PLC, MAS Holdings, Hemas Holdings PLC, බෙදාහැරීමේ සහකරු වශයෙන් සර්වෝදය ශ්‍රමදාන ව්‍යාපාරය සහ විගණන සහකරු වශයෙන් PwC Sri Lanka යන ආයතන එක්ව ආරම්භ කළ පසුව ක්‍රම ක්‍රමයෙන් CBL සමූහය, Citi බැංකුව, Sunshine Holdings PLC, Huawei Technologies Lanka Co සහ Unilever සමාගමද එක්වූ 'මනුදම් මෙහෙවර' මානුෂීය ක්‍රියාන්විතයට පසුගියදා London Stock Exchange සමූහයද එක්වූයේ සමස්ත සමාජයටම තම ආයතනය පාර්ශවයෙන්ද සැලකිය යුතු දායකත්වයක් ලබාදීමට වගකීමක් ඇති බවට විශ්වාස කරමිනි

වත්මන් ආර්ථික තත්වය හමුවේ දිවයින පුරා පීඩාවට පත්ව සිටින ප්‍රජාව අතරින් පවුල් 200,000ක් ඉක්මවා හදිසි සහන සැලසීම අරමුණු කරමින් ක්‍රියාත්මක වන 'මනුදම් මෙහෙවර' වැඩසටහන තුළින් මේ වන විට දිස්ත්‍රික්ක 25 පුරාම හදිසි සහන බෙදා හැරෙමින් පවතින අතර, මේ දක්වා අවශ්‍යතා සහිත පවුල් 115,000 කට වැඩි සංඛ්‍යාවකට ආධාර ලබාදී තිබේ. ඵලදායී ආර්ථික ප්‍රතිසාධන සැලැස්මක් තුළින් තිරසාර ප්‍රතිලාභ හුවමාරු ක්‍රමයක් රට තුළ ස්ථාපිත කිරීම දක්වා ‘මනුදම් මෙහෙවර’ වැඩසටහන සිය සහන කටයුතු අඛණ්ඩව රැගෙන යනු ඇත.

'මනුදම් මෙහෙවර' ක්‍රියාන්විතයට තම සමාගම එක්වීම සම්බන්ධයෙන් අදහස් දැක්වූ London Stock Exchange Sri Lanka සමූහයේ මානව සම්පත් ප්‍රධානී පුලස්තිකා වීරසිංහ “ශ්‍රී ලංකාව පවතින ආර්ථික තත්වයෙන් නැවත යථා තත්වයට පත්කරගැනීම වෙනුවෙන් මෙරට පෞද්ගලික අංශයේ ආයතන හා සමාගම් එක්ව පෙරමුණ ගැනීම දැකීමත් සැබැවින්ම අප තුළ දැඩි උද්‍යෝගයක් ඇති කළා. අපේ පාර්ශවයෙන් සමාජයට යළි පෙරළා දෙයක් ලබාදිය යුතු බව London Stock Exchange Sri Lanka අපි දැඩිව විශ්වාස කරනවා. අපේ රටට අත්‍යවශ්‍යම මොහොතක අපේම ජනතාව වෙනුවෙන් පෙරළා අපගේ යුතුකම ඉටුකරන්නට අවස්ථාවක් සලසාදීම පිළිබඳව මම 'මනුදම් මෙහෙවර' කණ්ඩායමට මගේ ස්තුතිය පුද කරනවා. අසීමිත දරාගැනීමේ ශක්තියකින් පරිපූර්ණ, ඕනෑම විපත්තිදායක තත්වයක් හමුවේ යළි නැගී සිටින්නට සමත් පෞරුෂයකින් හෙබි ශ්‍රී ලංකාවට අපගේ සාමූහික මෙහෙවර මනා පිටිවහලක් වනු ඇත.ශ්‍රී ලංකාවට යළි නැගී සිටීමට හැකි වාතාවරණයක් වෙනුවෙන් අපගේ දායකත්වයද ලබාදීමට හැකිවීම මහත් සතුටක්.”

නව හවුල්කාරිත්වය පිළිබඳ සිය අදහස් ප්‍රකාශ කළ, ඩයලොග් ආසිආටා පීඑල්සී හි සමූහ ප්‍රධාන මූල්‍ය නිලධාරී හොං සු වොං මහතා,“බරපතල ආර්ථික තත්වයක් හමුවේ දැඩි ලෙස පීඩාවට පත්ව සිටින මෙරට ප්‍රජාවට අත්‍යවශ්‍ය සහන කඩිනමින් සැලසීම වෙනුවෙන් ඩයලොග් සහ මෙරට පෞද්ගලික අංශයේ සමාගම් කිහිපයක් එක්ව මනුදම් මෙහෙවර මානුෂීය ක්‍රියාන්විතය පසුගිය අප්‍රේල් මාසයේදී ආරම්භ කළා.මනුදම් මෙහෙවර ක්‍රියාන්විතය සමඟ සම්බන්ධ වූ ආයතන හා සමාගම් දායකවූයේ සිය මුදල් පරිත්‍යාග පමණක් නොවෙයි, තමන්ගෙ සම්පත් හා විශේෂඥ දැනුම ඒ වෙනුවෙන් කැප කරමින්.මෙම ක්‍රියාන්විතයට අපත් සමඟ එක්වීම පිළිබඳව මනුදම් මෙහෙවර කණ්ඩායම වෙනුවෙන් මම London Stock Exchange Sri Lanka සමාගමට ස්තුතිවන්ත වෙනවා. ඉකුත් අප්‍රේල් මාසයේදී ක්‍රියාවට නංවන ලද මනුදම් මෙහෙවර වැඩසටහන හරහා මේ දක්වා දිවයිනේ සියලුම දිස්ත්‍රික්කවල අවශ්‍යතා සහිත පවුල් 115,000කට වැඩි සංඛ්‍යාවකට ආධාර ලබාදී මට අපි සමත්ව තිබෙන අතර, අපගේ ඉලක්කය පවුල් 200,000 ක් ඉක්මවා සහන සැලසීමවුවත් මේ අපගේ ආරම්භය පමණයි. අපගේ මෙම මෙහෙවර සාර්ථක කරගැනීම සඳහා සමාජීය යහපැවැත්ම අරමුණු කරගත් සෙසු ආයතනවලටද මේ සාමූහික ප්‍රයත්නය සමඟ අත්වැල් බැඳගන්නා ලෙස මම ඉල්ලා සිටිනවා.”

දිවයින පුරා දැඩි ලෙස පීඩාවට පත්ව සිටින පවුල්වලට අවශ්‍ය කඩිනම් සහන සැලසීම වෙනුවෙන් ගන්නා සාමූහික ප්‍රයත්නය සමඟ එක්වෙමින් ඊට දායක වන ලෙස ‘මනුදම් මෙහෙවර’ සෙසු සියලු පුරවැසියන්ට හා ආයතනවලට ඇරයුම් කරයි. ඕනෑම පුද්ගලයෙකුට https://dlg.lk/donate/ වෙබ් අඩවියට පිවිස සිය ක්‍රෙඩිට්/ ඩෙබිට් කාඩ්පත භාවිතයෙන් හෝ බැංකු හුවමාරුවකින්, Star Points හුවමාරුවකින්, eZ Cash, Genie, බැංකු තැන්පතු හෝ 077 642 1421 අංකයට සිදුකරන top – up කිරීම් හරහා මේ සඳහා දායක විය හැක. මීට අමතරව පරිත්‍යාගශීලීන්ට සනාථ කරන ලද සුබසාධන අරමුණක් සහිත ශ්‍රී ලංකාවේ ප්‍රථම මූල්‍යාධාර වෙබ් අවකාශය වන www.karuna.lk ඔස්සේද ඉතා පහසුවෙන් තම මූල්‍ය පරිත්‍යාගවලින් දායක විය හැක.

‘මනුදම් මෙහෙවර’ පිළිබඳ වැඩි විස්තර සඳහා dlg.dialog.lk/manudam-mehewara. වෙත පිවිසෙන්න.